ASCO AR app for iPhone and iPad

Azərbaycan Xəzər Dəniz Gəmiçiliyinin əsası 1858-ci ildə “Qafqaz və Merkuri” Səhmdar Cəmiyyətinin yaradılması ilə qoyulmuşdur. 160 illik zəngin tarixə malik Gəmiçilik bu müddət ərzində şanlı yol keçmişdir, və bugün Azərbaycan gəmiçiliyi özündə illərin təcrübəsini, eləcə də müasir dövrün tələblərinə uyğun qurulmuş korporativ idarəetmə sistemini cəmləşdirir.

Azərbaycan Respublikası Prezidentinin 22 oktyabr 2013-cü il tarixli Sərəncamına əsasən, Azərbaycan Xəzər Dəniz Gəmiçiliyi qapalı səhmdar cəmiyyəti formasında yenidən təşkil edilmiş və öz inkişafının yeni mərhələsinə qədəm qoymuşdur. Belə ki, həmin Sərəncama əsasən, respublikada mövcud olan iki böyük donanma – Azərbaycan Dövlət Xəzər Dəniz Gəmiçiliyi və Azərbaycan Respublikası Dövlət Neft Şirkətinin Xəzər Dəniz Neft Donanması birləşdirilərək "Azərbaycan Xəzər Dəniz Gəmiçiliyi" Qapalı Səhmdar Cəmiyyəti (ASCO) yaradılmışdır.

Hazırda, ASCO Xəzər regionunda ən böyük gəmiçilik şirkəti olmaqla, aşağıdakı istiqamətlər üzrə xidmətlər təqdim edir:
• Yükdaşımalar
• Neft sənayesinə ixtisaslaşmış ofşor xidmətləri
• Gəmi təmiri və tikintisi
• Təhsil və təlim
• Logistika ximətləri
• Quru yük limanı xidmətləri
• Agentlik xidmətləri

ASCO-nun donanmasında 16 tipdən artıq müxtəlif təyinatlı və geniş profilli, ümumi sayı 250-dən çox olan gəmilər mövcuddur. Yükdaşımaları təmin edən nəqliyyat donanmasına tanker gəmiləri, universal quru yük gəmiləri, bərələr və Ro-Ro tipli gəmilər daxildir. Neft sənayesinə ixtisaslaşmış ofşor xidmətləri təqdim edən donanmanın tərkibinə isə kran gəmiləri, sərnişin gəmiləri, lövbərdaşıyan təchizat-yedək gəmiləri (AHTSV), özül təchizat gəmiləri (PSV), yedək gəmiləri, dalğıc gəmiləri, yanğınsöndürən gəmilər, barjalar, mühəndis-geoloji gəmilər, sualtı borudüzən gəmilər, torpaqqazan gəmilər və digəriləri daxildir.

Gəmiçiliyin fəaliyyətinin şaxələndirilməsi və bir bazardan asılılığının azaldılması məqsədi ilə, 2014-cü ildən etibarən ASCO Xəzərdən kənar hövzələrdə fəaliyyətini bərpa etmişdir. Hazırda, ASCO Qara və Aralıq dənizi hövzələrində Azərbaycan bayrağı altında 14 ədəd gəmi, o cümlədən 12 ədəd quru yük gəmisi və 2 ədəd tanker istismar edir.
Bugün, ASCO fəaliyyətini Azərbaycanın regionda nəqliyyat-logistika qovşağına çevrilməsi, ölkəmizin əlverişli coğrafi mövqeyinin və onun tranzit potensialının reallaşdırılması, eləcə də Trans-Xəzər dəhlizinin inkişaf etdirilməsi istiqamətində qurur və bu istiqamətdə ölkəmizin, eləcə də digər dövlətlərin yükdaşımalarda iştirak edən müvafiq qurumları ilə sıx əməkdaşlıq edir.